![Ein Stapel sorbischer Wörterbücher | prawa za wobrazy: MDR/Teresa Stübner Ein Stapel sorbischer Wörterbücher](https://cdn.mdr.de/index-transparent_h-85_w-128_zc-42706b75.gif)
Serbska rěč so wuwiwa – Rěčny kućik z dr. Sonju Wölkowej, dnja 24.11.2021 Rěčny kućik - drobnoplanet
Hauptinhalt
24. nazymnika 2021, 10:54 hodź.
Rěčny kućik - drobnoplanet
Pluto je astronomiske ćěleso w našim słónčnym systemje, kotryž sym ja w šuli hišće jako planet zeznała. Před něšto lětami pak je Pluto tutón status zhubił a zarjaduje so po definiciji Mjezynarodneje astronomiskeje unije IAU jako “Zwergplanet”. Kak chcemy to serbsce pomjenować? Njedawno sym słyšała wuraz palčikowy planet. Na prěni pohlad wšak wotpowěduje wón němskej předłoze, tola bych sej tež předstajić móhła, zo je tajki palčikowy planet wot palčikow wobydleny planet, potajkim něšto kaž “Zwergenplanet”. Hdyž pohladamy za serbskimi wotpowědnikami druhich němskich zestajenkow z prěnim čłonom “Zwerg~” do słownikow, wšak njenamakamy tam přełožki z wobstatkom palčikowy. W zwisku ze zwěrjatami jewi so tam na přikład adjektiw małoróstny – tak je “Zwergziege” serbsce małoróstna koza abo pomjenuje so prosće z pomjeńšenku kozyčka. – To pak za naš planet žane rozrisanje njeje, wšak wón žiwy njeje a njerosće. Pomjenowanje małoplanet so najskerje tež njehodźi, dokelž rozeznawa wědomosć “Kleinplaneten” a “Zwergplaneten”, a tuž trjebamy małoplanet jako wotpowědnik za “Kleinplanet”. A tak bych namjetowała, zo móhli Pluto snano jako drobnoplanet, ewentuelnje tež jako miniplanet pomjenować.
dr. Sonja Wölkowa
Sorbisches Programm