Powěsće: pjatk, 31.01.2025
Hauptinhalt
03. małeho róžka 2025, 12:07 hodź.
Budyšin: Hospodarski plan 2025 wobzamknjeny
Budyska měšćanska rada je etat za tute lěto wobzamknyła. Wón ma cyłkowny wolumen wjace hač 100 milionow eurow. Zaplanowane su mjez druhim jedyn milion eurow za ponowjenje Mosta měra a jedyn a poł miliona eurow za spotorhanje stareje sportownje wyšeje šule na Allendowej dróze. Za planowanje móžneho twara mosta přez Sprjewju za pěškow su tři miliony eurow zaplanowane. Tež do škita před wulkej wodu chce město Budyšin inwestować. Něhdźe 3,2 milionaj eurow je předwidźane za naprawy při Albrechtowce a za twar spjatnišća w Sćijecach/Ratarjecach.
Załožba: Nowe wupisanje za stipendije
Załožba za serbski lud znowa stipendij za dźělny studij na Instituće za sorabistiku Lipšćanskeje uniwersity wupisa. Załožba hižo wjele lět wukrajnym studowacym tajke stipendije spožča. Z tym spěchuje wědomostny dorost a wědomostnu wuměnu wosebje ze słowjanskimi susodnymi krajemi. Požadanja za zymski semester 2025/26 su hač do 1.měrca móžne, rěka w medijowej zdźělence. Požadanska procedura bu lětsa na onlinowe požadanje z webformularom přestajena a aktualizowana.
Běła Woda: Něhdyša škleńčernja bórze zetkawanišćo
Areal pod pomnikoškitom stejaceje něhdyšeje škleńčernje w Běłej Wodźe ma so stać ze srjedźišćom za nowe zasydlenja w nutřkownym měsće a za mnohostronske wužiwanje přez wobydlerjow. Tole je měšćanska rada na swojim zańdźenym posedźenju wobzamknyła. Tak maja nastać sydlišćo, přemysłowa přestrjeń a kulturne zetkawanišćo. Nadawk za planowanje dóstanje Institut za nowu industrijowu kulturu w Choćebuzu. Kóšty za cyłkowny projekt wučinja něhdźe 12,5 milionow eurow. Město nadźija so, zo dóstanje pjenježne spěchowanje z hornca za strukturnu změnu. Same spočatki něhdyšeje škleńčernje w Běłej Wodźe sahaja wróćo do lěta 1872.
Hornja Łužica: Zwjazkowa wobora je zakónčiła zwučowanja
Na wojerskim zwučowanišću Hornja Łužica su so bojowniske zwučowanja skónčili, poslednje bě štwórtkowniše z parašutistami. Kaž zdźěli komandant wójska, je to jednotka Zwjazkoweje wobory, kotraž je mjez druhim při ewakuacijach zasadźena. Jeli su kónčiny ćežko docpějomne, skakaja parašutisća z lětadłow. Druhdy skutkuja za specialne nadawki tež we wukraju. Něhdźe 1.200 wojakow zwjazkoweje wobory bě na cyłkownje dźewjećdnjowskim zwučowanju wobdźělene.
Slepo: Nowa gratownja je natwarjena a hotowa
Nowa gratownja za dobrowólnu wohnjowu woboru w Slepom je hotowa. Po pjeć lětach planowanja a twara je projekt zakónčeny, zdźěli nawoda twarskeho zarjada gmejny. Poslednje dźěła na wonkownej přestrjeni so tuchwilu zakónča. Wot srjedź februara chcedźa kameradojo gratownju wužiwać. Tuchwilu woni přećahnu. Nowotwar je 3 miliony eurow płaćił. Kóšty su sej Swobodny stat Sakska, wokrjes Zhorjelc, energijowy zastaraćel LEAG a gmejna Slepo dźělili.
Budyšin: Knižna premjera "Serbstwo, quo vadis?"
Něhdźe pjećdźesat hosći dožiwi štwórtk w Smolerjec kniharni premjeru zběrki esejow "Serbstwo, quo vadis?". Wudawaćelka Marka Maćijowa bě 19 awtorow a awtorkow za teksty zdobyła. Swojej twórbje čitaštaj wčera Lubina Malinkowa a Julian Nyča. Po čitanju wobsteješe móžnosć diskusije a wólneje bjesady. Tež w Delnjej Łužicy je knižne předstajenje planowane.
