Powěsće: póndźelu, 17.03.2025

17. nalětnika 2025, 10:35 hodź.

Wobsah artikla:

• Budyšin: To běchu 32. Serbske jutrowne wiki
• Šunow: Štomiki sadźeli
• Budyšin: Finisaža wosebiteje wustajeńcy „Wěčne pućowanje"
• Rowno: "Burske blido" na Njepilic dworje
• Semernik: Probowe lěhwo Smjerdźečanskich rejowarjow

---

Budyšin: To běchu 32. Serbske jutrowne wiki

Serbske jutrowne wiki w Budyšinje sobotu a njedźelu su wjac hač 3.100 wopytowarjow přićahnyli. Kaž rjekny předsydka Spěchowanskeho kruha za serbsku ludowu kulturu, Franciska Grajcarekowa, su z tym jara spokojom. Na wikach su debjerjo jutrownych jejkow swoje wuměłstwo pokazali, tež wušiwarka za narodnu drastu a zhotowjerce tykawčkow. Andreja Pawlikowa wot Serbskeho muzeja je wo serbskich jutrownych jejkach přednošowała. W Serbskej kulturnej informaciji běchu lětuše dobyćerske kolekcije jutrownych jejkow wustajene, a dźěći móžachu paslić a jejka walkować.

---

Šunow: Štomiki sadźeli

Něhdźe 40 pomocnikow je sobotu w Šunowje na 400 metrach při přibrjohu Klóšterskeje wody zhromadnje wjace hač 600 štomow a kerkow sadźało. Je to zhromadny projekt přirodoškitneho zwjazka BUND zhromadnje z gmejnu Ralbicy-Róžant. Pozadk je, zo su komuny hač do lěta 2027 winowate, wěsty dźěl wodźiznow zaso bóle přirodźe zbližić.

---

Budyšin: Finisaža wosebiteje wustajeńcy „Wěčne pućowanje"

Nimale 2.500 wopytowarjow je wosebitu wustajeńcu w Serbskim muzeju Budyšin "Wěčne pućowanje. Barba a słowo w twórbje ukrainskeho wuměłca Andrija Sharana" widźało. To rjekny kurator, dr. Jendrzych Soliński njedźelu na finisaži. Po zakónčacym wjedźenju přez wuměłca je so katalog k wustajeńcy předstajił. W nim předstaja so 100 mólbow, basnje Sharana ukrainsce a přełožene do serbšćiny, pólšćiny a němčiny kaž tež eseje w tutych rěčach. Spěchowany bu katalog z fondsa EU-małoprojektow euroregiona Pólska-Sakska. Wosebita wustajeńca pućuje nětko do měšćanskeho muzeja w Jeleniej Górje, hdźež so wot srjedź apryla pokaza.

---

Rowno: "Burske blido" na Njepilic dworje

Spěwy w Slepjanskej narěči a teksty połbura a ludoweho spisowaćela Hanza Njepile běštej sobotu hłownej temje burskeho blida na Njepilic statoku w Rownom. Nimo toho zawjedźechu so nowi čłonojo do Towarstwa Njepilic dwór a zeznajomichu so ze stawiznami dwora. Kaž zdźěli předsyda towarstwa, Manfred Nickel, chcedźa so hišće do bołmončki znowa zetkać, a to na debjenje jutrownych jejkow.

---

Semernik: Probowe lěhwo Smjerdźečanskich rejowarjow

Na třidnjowskim probowym lěhwje w čěskej wsy Semernik je kónc tydźenja Smjerdźečanska rejowanska skupina přebywała. 19 rejowarkow a rejowarjow nazwučowa tam nowu choreografiju za Mjezynarodny folklorny festiwal Łužica w tutym lěću. Reju nastajił a z nimi zwučował je jako projektny nawoda choreograf SLA Kornel Kolembus. Za tydźeń pojědu tohorunja rejowarjo Serbskeho folklorneho ansambla Wudwor do proboweho lěhwa.