Powěsće: sobotu, 15.03.2025
Hauptinhalt
17. nalětnika 2025, 10:40 hodź.
Chrósćicy: Poslednje posedźenje Zwjazkoweho předsydstwa Domowiny tuteje wólbneje doby
Poslednje předłohi a naćiski za wólbnu a hłownu zhromadźiznu Domowiny w aprylu je aktualne Zwjazkowe předsydstwo sobotu na swojim poslednim posedźenju wobzamknyło. W přichodnych dnjach dóstanu delegaća mapy z podłožkami za zhromadźiznu. Předsyda Domowiny Dawid Statnik: "Mamy wšak lětsa wjacore wulke rozsudy planowane. Jónu je to změna wustawkow, potom změna programa. Za to smy tež dali dołho w předpolu zjawnosći a našim towarstwam móžnosć sobudiskutować. To bě po mojim měnjenju tež jara derje a jara radźene. Jow su wšelake namjety přišli, tak zo móžeš z toho wuchadźeć, zo je kóždy swoje móžnosće wužiwał. Tak mamy to tež wobsahowje jara derje přihotowane."
Budyšin: Mytowanje najrjeńšich jutrownych jejkow
Dobyćerki wubědźowanja wo najrjeńše jutrowne jejko 2025 su Bettina Borcherdingowa z Rahdena, Ines a Vanessa Trenschelec z Allendorfa Lumda, Andrea Hertelowa z Weimara a Sylke Roßbachec-Schreierowa z Choćebuza. Wone wobsadźichu w tradicionelnych technikach prěnje městna. To zdźěli jury po mytowanju pjatk. Třeće městno při wjacebarbnym wóskowanju wudoby sej Marja Šefrigowa z Njebjelčic, třeće městno při wužrawanju Helena Pallmanowa z Budyšina. Wšě dobyćerske kolekcije kónc tydźenja na Serbskich jutrownych wikach w Budyskim Serbskim domje prezentuja. Tam móža wopytowarjo 45 debjerjam přihladować.
Wochozy: Park błudźenkow zaso přeprošuje
Łužiski park błudźenkow we Wochozach startuje sobotu do noweje sezony. Kaž rjekny předsyda spěchowanskeho towarstwa parka Peter Scholze, je wot časa wotewrjenja 2003 hač donětka 1,6 milionow wopytowarjow přišło. Loni bě to 65.000 - tendenca bě zašłe lěta stupaca. Prěnje lětuše wjerški budu w aprylu parkowy běh, němsko-pólski jutrowny swjedźeń z atrakcijemi wosebje za swójby a 1. meje wiki rostlinow.
Chelno: Google reaguje na próstwu Radworskeje gmejny
Koncern Google je na próstwu Radworskeje gmejny reagował a nawigaciju po komunje změnił. Po tym zo bě Radworska gmejna wjesnu dróhu w Chelnje ponowić dała, su ju mnozy jako skrótšenku na zwjazkowu drohu B 96 wužiwali. Tež nawigaciski system Google maps bě puć z awtodrohi A 4 na přikład do Radworja přez Chelno radźił. Na naležnu próstwu gmejny je to Google tutón tydźeń zaso změnił. Za šoferow rěka to drje nětko 300 metrow wokołopuća, za Chelnjanow pak je so wobchadna situacija polěpšiła.
Sport: Tójšto sportowych znamješkow wudźělili
W Budyskim wokrjesu je loni wjacore tysac ludźi pruwowanje za Němske sportowe znamješko złožiło. To zdźěli wokrjesny sportowy zwjazk. Tak su zamołwići zwjazka loni wjace hač 4.400 złotych, slěbornych a bronzowych znamješkow wudźělili - 600 wjace hač lěto do toho. Dźewjeć wot dźesać znamješkow spožčichu dźěćom a młodostnym wot šěsć do 18 lět. Tomu přidruži so 2.000 znamješkow za pěstowarske dźěći. Zo bychu sej Němske sportowe znamješko wudobyli, dyrbja ludźo wěste wukony w disciplinach koordinacija, sylnosć, wutrajnosć a spěšnosć docpěć.
