Powěsće: wutoru, 18.03.2025

18. nalětnika 2025, 10:35 hodź.

Wobsah artikla:

• Budyski wokrjes: Nimale poł lěta žanu społnomócnjenu za serbske naležnosće
• Kubłanje: Nimale poł-poł
• Kultura: Hotuja so na šulerske dźiwadła
• Literatura: Pojědu na knižne wiki
• Budyšin: Zběraja wotpadki

---

Budyski wokrjes: Nimale poł lěta žanu społnomócnjenu za serbske naležnosće

Městno społnomócnjeneje za serbske naležnosće Budyskeho wokrjesa w krajnoradnym zarjedźe njeje přeco hišće wobsadźene. Wot nazymy, jako bě dotalna społnomócnjena zarjad wopušćiła, so wo interne znowawobsadźenje prócuja. Kaž informuje nowinska rěčnica wokrjesa na naprašowanje, njeběchu dotal wuspěšni. Tohodla bu rozsudźene, zo so městno wupisa - najprjedy zaso internje, a hakle při njewuspěchu zjawnje. Nadawki społnomócnjeneje wosoby za serbske naležnosće wučinjeja poł dźěłoweho městna. Wona ma krajneho radu serbske prašenja nastupajo poradźować, naprawy za přesadźenje serbskich wustawkow kontrolować a zwiski k serbskim akteram koordinować.

---

Kubłanje: Nimale poł-poł

W Hornjej Łužicy je po prěnim šulskim połlěće někak 4.500 šulerkow a šulerjow 4. lětnika swoje kubłanske doporučenje dóstało. 47 procentow z nich móže na gymnazij hić, 53 procentow měło po swójskich tuchwilnych wukonach wot 5. lětnika wyšu šulu wopytać. Kaž kultusowe ministerstwo zdźěli, leži podźěl doporučenjow za gymnazij w Budyskim a Zhorjelskim wokrjesu snadnje pod sakskim přerězkom. Loni su so w Sakskej tři štwórćiny staršich po doporučenju šule měli.

---

Kultura: Hotuja so na šulerske dźiwadła

K lětušemu šulerskemu swětowemu dnjej dźiwadła změje Němsko-Serbske ludowe dźiwadło Budyšin 30 předstajenjow. To praji intendant NSLDź Lutz Hillmann póndźelu na nowinarskej rozmołwje. Tež wosom serbskich šulerskich dźiwadłowych předstajenjow je na dohromady jědnaće jewišćach w Sprjewinym měsće připowědźene. Dźiwadło liči z wjace hač 2.000 wopytowarjemi a wopytowarkami. Tež ministerski prezident Sakskeje, Michael Kretschmer, je jako patron swjedźenja pódla. Lětuši 24. šulerski swětowy dźeń dźiwadła přewjedźe so 31. měrca.

---

Literatura: Pojědu na knižne wiki

Ludowe nakładnistwo Domowina prezentuje k lětušim knižnym wikam w Lipsku wjacore nowe publikacije. To praji jednaćel Syman-Pětr Cyž wčera na nowinarskej rozmołwje w Budyšinje, na kotrejž su hornjołužiske nakładnistwa za swoje lětuše publikacije na wikach wabili. Ćežišćo Ludoweho nakładnistwa Domowina stej nowej publikaciji Benedikta Dyrlicha a němskorěčna kniha wo pućowanskich rozprawach we Łužicy we 18. a 19. lětstotku. Knižne wiki w Lipsku wotměja so wot 27. do 30. měrca.

---

Budyšin: Zběraja wotpadki

W Budyskim wokrjesu su so póndźelu akciske dny zběranja wotpadkow zahajili. Po informacijach krajnoradneho zarjada je so dohromady 60 iniciatiwow za akciju přizjewiło. To je dwójce telko kaž loni. Přizjewili su so gmejny, šule, pěstowarnje, towarstwa a priwatnicy mjez druhim z Němcow, Hodźija, Serbskich Pazlic a Ralbic. Akciske dny zezběranja wotpadkow su do srjedź apryla.