Powěsće: štwórtk, 20.03.2025
Wobsah artikla:
Budyšin: Škody při mostach spěšnišo spóznać
W Budyšinje je Zwjazkowy minister za wobchad Volker Wissing wčera móst za slědźenje wotewrił. 45 metrow dołhi móst na ležownosći firmy Hentschke Bau je połny sensorow. Z tutymi a z pomocu kumštneje inteligency móža wo wjele dokładnišo hač dotal přepytować, kak mosty a dalše twarjenja zestarjeja. Z datami hodźa so tak mjenowane digitalne dwójniki wobstejacych mostow stworić a móžne škody wěšćić. Kaž Drježdźanska Techniska uniwersita zdźěli, je tajki realny labor dotal jónkrótny na swěće. Partnerojo w projekće su nimo uniwersity a firmy Hentschke Bau institut Hamburgskeje TU kaž tež inženjerski běrow z Weimara.
Grodk: Dźěłarnistwo a LEAG so dojednałoj
Sobudźěłaćerjo łužiskeho energijoweho a brunicoweho předewzaća LEAG dóstanu 7,5 procentow wjace mzdy a to w dwěmaj schodźeńkomaj. Nimo toho dóstanu čłonojo dźěłarnistwa jónkrótnje 1.000 eurow a w přichodźe wob lěto pak dwaj swobodnej dnjej pak město toho 500 eurow. Na to dojednaštej so srjedu wječor w třećim tarifowym kole łužiske předewzaće a dźěłarnistwo IGBCE w Grodku.
Zahrodnistwa: Zazběh do lětušeje sezony
W domoródnych zahrodnistwach je předawanje nalětnich kwětkow a dalšich rostlinow z połnej paru zaběžało. Kaž Matthias Pěčka z Holešowa rjekny, poskićeja nimo matřoškow, kropačkow, narcisow a tulpow, kotrež na tysac kwadratnych metrach plahuja, tež kerki a štomiki. Na něhdźe jenak wulkej płoninje Steglichec zahrodnistwa w Budyšinje je, po jich informacijach, někak pjećina nalětnich kwětkow předata. Tež Krollecy we Wudworju poskićeja hišće nadosć kwětkow a zeleninowych rostlinkow. W Koćinje su hłownu sezonu runje hakle zahajili. Tamniši nawoda zahrodnistwa Matthias Čórlich nadźija so, zo móža nětko při miłych temperaturach wosebje zeleninowe rostliny předawać.
Rakecy: Gmejna solidnje hospodariła
Rakečanska gmejna měješe loni wjac dochodow dyžli lěto před tym, ale tež wyše wudawki. Komornica Franziska Pfeifferowa předstaji wčera gmejnskej radźe lońšu hospodarsku rozprawu. Nimale wšitke planowane ličby buchu dodźeržane. Jeničce přemysłoweho dawka bě wo wjele mjenje hač předwidźane. Dale woteběrała je tež ličba wobydlerjow. Tuchwilu bydli w Rakečanskej gmejnje 3.360 ludźi. Před sydom lětami bě jich hišće 130 wjac.
Prezidij wuradźował: Pawkojo do Pólskeje
Na swojim posedźenju je prezidij Domowiny zastupjerja Serbskeho młodźinskeho towarstwa Pawk na jutrowny seminar MENS pod hesłom “widźomnosć płaći / visibility matters” delegował. Tutón wotměje so wot 11. do 18. apryla w pólskim Opole. Seminar organizuje tamniši młodźinski zwjazk němskeje mjeńšiny.
Lipsk: Stafle za 40. Sokołski wolejbulowy turněr wulosowali
W Lipsku su wčera popołdnju wulosowali stafle za lětuši 40. Sokołski wolejbulowy turněr wo pokal Domowiny. Tutón wuhraje so sobotu za tydźeń ( 29. měrca) w Radworskej Slaviji. Cyłkownje wobdźěli so na turněrje lětsa dwanaće mustwow, rozdźělene do třoch staflow. Při wulosowanju přitomni běštaj jako zastupjerjej Serbskeho Sokoła, předsyda Jan Hrjehor a Józef Šwon, losowanskej soninje běštej moderatorce sportoweje redakcije MDR Aktuell, Mo Krüger a Stefanie Blochwitz.