Powěsće: pjatk, 21.03.2025

22. nalětnika 2025, 04:20 hodź.

Wobsah artikla:

• Choćebuz: Forum wo přitomnosći a přichodźe serbskeje digitalneje kultury
• Wóslink: Wuznawa so k sydlenskemu rumej
• Malešecy: Nowe serbske towarstwo po 80 lětach
• Ralbicy-Róžant: Wuradźowanje wo hospodarskim planje

---

Choćebuz: Forum wo přitomnosći a přichodźe serbskeje digitalneje kultury

W Choćebuzu je so štwórtk dwudnjowska konferenca wo serbskich žiwjenskich rumach w digitalnym času zahajiła. Na forumje wobdźělichu so wědomostnicy a IT-fachowcy z Hornjeje a Delnjeje Łužicy. Tak předstajichu mjez druhim projekt serbskeje digitalneje karty a digitalny centrum Serbskeho instituta. Nimo toho prezentowachu na wikach hižo eksistowace poskitki kaž předčitansku funkciju abo rešeršu w serbskich archiwach z pomocu kumštneje inteligency.

---

Wóslink: Wuznawa so k sydlenskemu rumej

Sydom z dźewjeć wjesnych dźělow gmejny Wóslink ma so Serbskemu sydlenskemu rumej přidružić. Tole tamniša gmejnska rada na swojim minjenym posedźenju jednohłósnje rozsudźi. Domowina tutón proces podpěra. Předsyda Dawid Statnik, kotryž je so na posedźenju wobdźělił, praji k rozsudej, zo je wuznaće k serbskej rěči, kulturje a stawiznam wažne za skrućenje dwurěčneje zhromadnosće we Łužicy. Zakład wobzamknjenja gmejnskeje rady su mjez druhim rozmołwy we wjesnych radach a naprašowanje w Debricach, na kotrymž su wobydlerjo podali, zo pěstuja serbsku kulturu a rěč. Nimo toho chodźa někotre dźěći Wóslinčanskeje gmejny na Serbsku wyšu šulu susodneje gmejny Ralbicy-Róžant.

---

Malešecy: Nowe serbske towarstwo po 80 lětach

W Malešecach bu štwórtk wječor po 80 lětach zaso serbske towarstwo "Nadźija" wozrodźene. Na iniciatiwu rěčneho motiwatora pola Domowiny, Luciana Kaulfürsta, je so k tomu dźesać załoženskich čłonow zešło. - k tomu Lucian Kaulfürst: "Najprjedy sym ja ekstremnje wjesoły, zo je so to radźiło. Te tamne je, zo je so tež woprawdźe mjezygeneracisce něšto radźiło. My mamy tu najmłódšu, ta je 18, a najstarši je najskerje 72. Z Malešec, Kortnicy, z Wulkeje Dubrawy, z Běłeje Hory, z Hliny. Nětko so ja nadźijam, zo my přez tutu platformu cil mamy, jedyn zhromadny, a přez tutón cil tež hinak skutkować móžemy." Předsyda noweho towarstwa je Hagen Jurack z Malešec, wo financy stara so Marie-Teres Vogelowa z Kortnicy. Jedyn z prěnich nadawkow towarstwa su přihoty na 800. jubilej wsy. W nowembrje planuja potom filmowy a rejowanski serbski wječor we "Wódnym mužu" w Malešecach.

---

Ralbicy-Róžant: Wuradźowanje wo hospodarskim planje

Gmejna Ralbicy-Róžant změje lětsa prěni króć po lětach zaso hospodarski plan z plusom pod smužku. Wolóženje pak je jenož nachwilne. Pozadk je, zo móže gmejna lětsa z wjetšej přiražku wot kraja ličić, dokelž měješe wona před lětomaj wo tójšto mjenje dochodow z přemysłoweho dawka. To so hakle ze zapozdźenjom wuskutkuje. Štwórtk je gmejnska rada wo planje wuradźowała. Wobzamknyć chce jón w meji. Jako lutowanska naprawa do přichoda je mjez druhim předwidźane, zo maja wjesne rady w swojich towarstwowych domach reparatury hač do 400 eurow wob lěto same zapłaćić. Wšako maja dochody z podruže, praji wjesnjanosta Hubertus Ryćer. Dotal bě gmejna tute kóšty kompletnje přewzała.