Powěsće: póndźelu, 24.03.2025

24. nalětnika 2025, 08:55 hodź.

Wobsah artikla:

• Sulšecy: Schadźowanka lajskich dźiwadłowych skupin
• Praha: Hłowna wólbna zhromadźizna SPL
• Koslow: Saněrowanje łučnych hatow hotowe
• Hodźij: Hłowna zhromadźizna domizniskeho towarstwa
• Mišno: Nowe městno za Tomasza Dawidowskeho

---

Sulšecy: Schadźowanka lajskich dźiwadłowych skupin

140 aktiwnych a něhdyšich hrajerjow z Chrósćic, Šunowa/Konjec a Sulšec je so sobotu na schadźowance lajskeho dźiwadła w Sulšecach pola Kulowa zetkało. Bě to prěni raz zaso po 25 lětach. Kóžda z přitomnych pjeć skupinow předstaji krótku scenu. Nimo toho wustupichu chór Bratrowstwa, spěwotwórc Bernd Pittkunings a skupina "Fünf an der Feier". Hłowna organizatorka Sonja Hrjehorjowa bě z wječorom jara spokojom. W přichodźe ma so zetkanje lajskich dźiwadłowych skupin wospjetować. Sobotniša schadźowanka je so přez Załožbu za serbski lud a Sakske idejowe wubědźowanje „simul+” spěchowała.

---

Praha: Hłowna wólbna zhromadźizna SPL

Lukaš Novosad bu w Praze na hłownej a wólbnej zhromadźiznje Towarstwa přećelow Serbow znowa za předsydu wuzwoleny. Nimo toho počesćichu tam sobotu wosoby z wosebitym mytom Soraborum Saluti, kotrež spožča so dołholětnym partneram za spomóžne zhromadne dźěło. Madleńka Šołćic, něhdyša dramaturgowka Němsko-Serbskeho ludoweho dźiwadła, dósta je za dołholětne šěrjenje profesionelneho a lajskeho dźiwadła w Čěskej. Wjacori Serbja pobychu w čěskej stolicy a wobhladachu sej při tutej přiležnosći wustajeńcy "Swoboda kiwa" a "Fanojo Europeady".

---

Koslow: Saněrowanje łučnych hatow hotowe

Dźěła při łučnych hatach w Koslowje su zakónčene. Kaž zdźěli přirodoškitna stacija Njeswačidło, su z hatow nimo błóta tež sćinu a kerki wotstronili. Tež zastaranje hatow z čerstwej wodu bu polěpšene; brjohi buchu spłonjene, zo móže w tutej conje wjace zwěrjatow žiwe być. Niska woda při brjoze je wažny žiwjenski rum za wódne bruki, amfibije a libele. Hladanje hatow je dźěl projekta, kotryž spěchuje Zwjazkowy zarjad za přirodoškit.

---

Hodźij: Hłowna zhromadźizna domizniskeho towarstwa

Hodźijske domizniske towarstwo njeje sobotu na swojej lětnej zhromadźiznje jenož lońšu dźěławosć bilancowało, ale wuzwoli tež nowe předsydstwo z předsydu Peterom Beerom. Nimo toho słuchachu na přednošk stawiznarki dr. Lubiny Malinkoweje z Rakec, kiž pokaza na stawizny Ochranowa a wuznam nabožneho hibanja, tež z Hodźijskeje wosady sem - kaž na přikład na misionara Jurija Kmocha z Małeje Boršće. Domizniske towarstwo w Hodźiju ma lětsa 30-lětne wobstaće a chce z přizwolenych spěchowanskich srědkow nowe wjesne zetkanišćo stworić a z ławkami a lipu wozdebić.

---

Mišno: Nowe městno za Tomasza Dawidowskeho

Farar Tomasz Dawidowski, kiž měješe w zašłych měsacach wosadu w Šwicarskej, ma w přichodźe měšniske słužby we wosadźe swjateho Bena w Mišnje wukonjeć. Dekret biskopa Heinricha Timmereversa wuwjaza jeho z tym k 1. aprylej oficialnje z jeho nadawkow w Chróšćanskej wosadźe. To wozjewi tamniša wosada na swojej internetnej stronje. Nimale dźesać lět je farar Tomasz Dawidowski w Pančičanskej wikariji skutkował, mjez 2010 a 2015 bě w Reichenbachu, do toho we Wotrowje. Za krótki čas bě sej serbšćinu přiswojił.