Powěsće Serbskeho rozhłosa
Wobsah artikla:
Łužica: Połčas při projekće UNESCO 5
Partnerojo projekta UNESCO 5 su pozitiwnu mjezybilancu sćahnyli. Kaž referent Domowiny Clemens Škoda wobkrući, stej serbska rěč a kultura z pomocu projekta UNESCO 5 widźomnišej. Tež zwiski mjez Hornjej a Delnjej Łužicu a zhromadne dźěło z kubłanišćemi su tak skrućili. Mjez druhim su wjace hač 140 přewodnikow turistow wukubłali, pedagogiske materialije a hry wuwili kaž tež digitalnu platformu (www.lausitz-kultur.de) wutworili. Zwjazowacy element při tym je serbskosć, tak Škoda. Projekt UNESCO 5 běži hišće do lěta 2026. Wón zwjazuje Biosferowy rezerwat Błóta, Mužakowski zahork a Mužakowski park kaž tež Hornjołužisku holu a haty a serbske imaterielne herbstwo.
Konjecy: Hłowna wólbna hońtwjerskeho drustwa
Hońtwerske lěto 2024/25 běše swinjaceje mrětwy a wjelka dla jedne z najšpatnišich zašłych lět. To je mjezdruhim tenor lětneje hłowneje zhromadźizny hońtwjerskeho drustwa Konjecy pjatk wječor. Wotnajerskej zhromadźenstwje Konjecy a Ralbicy rozprawještej, zo je so jara mało dźiwiny třěliło - dźiwje swinje njeběchu žane pódla. Pozitiwne je, zo njeje so předsydstwje w zašłym lěće hońtwjerstwa žaneje wot dźiwiny nadźěłaneje škody přizjewiło.
Łužiska jězorina: Na Bjerwałdskim smědźa trajnje łódźe jězdźić
Na Bjerwałdskim jězoru móža wot lětušej sezony zaso čołmy a łódźe jězdźić. Nětko pak je sakska krajna direkcija trajnej dowolnosći za to dała - wšojedne hač za łódźe a čołmy z motorom abo bjez. Tři płoniny jězora pak so dla přirodoškita wobjězdźić njesmědźa a tež časowje je direkcija někotre prawidła zapisała. Tola z trajnymaj dowolnosćomaj maja inwestorojo wosebje do turistiskich atrakcijow na Bjerwałdskim jězoru skónčnje wěstotu za planowanje a inwesticije.
Rakecy: Móža nowu wohnjowu woboru twarić
Rakečanscy gmejnscy radźićeljo su wo rozdźělenju twarskich nadawkow za nowu gratownju wohnjoweje wobory w Stróži rozsudźili. Z tym su runali puć za najwjetše twarske předewzaće zašłych dźesać lět w gmejnje, praji wjesnjanosta Swen Nowotny. Dohromady płaći nowa gratowanja w Stróži 1,7 milionow eurow - Sakska twar spěchuje. W tamnišej wohnjowej woborje je tuchwilu 23 aktiwnych kameradow a kameradkow. Nimo toho maja dźěćacy a młodźinski wotrjad.
Budyšin: Delnjoserbscy šulerjo na wopyće w serbskich institucijach
75 šulerjow a šulerkow wosmych lětnikow Delnjoserbskeho gymnazija Choćebuz je wčera serbske institucije w Budyšinje wopytało. Projekt je so w lěće 2014 w kooperaciji ze Serbskim ludowym ansamblom prěni raz přewjedł, zdźěli Jana Krygarjowa wot SLA. Wot 2022 wobsahuje tež wopyt dalšich institucijow kaž Ludoweho nakładnistwa Domowina, Serbskeho muzeja, Němsko-Serbskeho Ludoweho dźiwadła kaž tež Serbskeho domu. We wjacorych skupinach dóstachu šulerjo nimo teoretiskich tež praktiske dohlady, na přikład w rejowanskej skupinje (SLA), při zestajenju strony nowiny (LND) abo při wóskowanju jejkow (SKI).
Bluń: Něhdyšu šulu ponowili
W Blunju je so wobnowjene twarjenje wjesneho zarjadnistwa pjatk zjawnosći spřistupniło. W rumnosćach něhdyšeje šule je nětko mjez druhim wustajeńca k stawiznam wsy zaměstnjena, kiž wobsahuje tež serbske stawizny. Přemysluje so dale wo tym, tež dźěle zběrki serbskeho zběraćela Helmuta Kurja z Blunja wustajić. To praji na naprašowanje wjesny předstejićer Thomas Redlich, kotrehož běrow je tež w ponowjenym twarjenju. Nimo toho je tam powjetšena wjesna biblioteka a mała kuchnja k wočerstwjenu za turistow. Něhdźe dwě a poł lěće je ponowjenje trało, 700.000 eurow je płaćiło. Wjetšina sumy bu spěchowana.