Mjeńšina serbšćiny 05.03.2025 z dr. Leńku Šołćic: Rěčny kućik - wyše a spody abo nad a pod
Hauptinhalt
22. smažnika 2011, 08:39 hodź.
Wyše a spody abo nad a pod
Wyše blida wisa lampa a spody blida kuri Hanka. Wšědnje wužiwamy a słyšimy tajke konstrukcije ze słowčkomaj wyše a spody a substantiwom w genitiwje, hdyž wuprajimy, hdźe něšto je. Tutej adwerbaj wužiwatej so wosebje we wobchadnej rěči w funkciji prepozicijow. W spisownej rěči stejitej město njeju prepoziciji nad a pod ze samsnym woznamom a substantiw za prepoziciju steji při prašenju „hdźe?“ w instrumentalu, potajkim: nad blidom wisa lampa a Hanka kuri pod blidom. Samsnej prepoziciji nad a pod wustupujetej pak tež ze substantiwom w akuzatiwje: lampu nad blido powěsnyć a Hanka zalěze pod blido, potajkim hdyž zwuraznimy směr čina abo pohiba a wotmołwu na prašenje dokal. We wobchadnej rěči wostanje konstrukcija adwerbow ze substantiwom w genitiwje: wyše blida powěsnyć a spody blida zalězć. Nad blidom abo pod blidom – snědać dyrbjeli lěpje za blidom.
