Powěsće: pjatk, 06.10.2023
Hauptinhalt
10. winowca 2023, 00:02 hodź.
Łužica: Žně chmjela zakónčene
Chmjelowe žně w Hornjej Łužicy su nimale zakónčene. W Krěpječanskim agrarnym předewzaću su z lětušimi žnjemi jara spokojom, zdźěli zawod na naprašowanje. Na 45 hektarach su nimale 110 tonow nažnjeli. W přichodźe chcedźa swoje chmjelowe pola powjetšić. Tež w agrarnym předewzaću Tuchorski lěs (Taucherwald) su ze žnjemi chmjela spokojom. Dobytk někotrych družin pak bě lětsa chłódneho nalěća dla špatniši. Na 58 hektarach, mjez druhim tež při A4, plahuja aromatiske a hórke chmjelowe družiny. Kónc oktobra so w Hornjej Łužicy zaso nowe chmjelowe rostliny sadźeja.
Lipsk: Nowe studijne lěto na Instituće za sorabistiku
Na Lipšćanskim instituće za Sorabistiku je so štwórtk z twarom hodźinskeho plana oficialnje nowe studijne lěto zahajiło. Něhdźe 30 ludźi bě přitomne, mjez nimi zastupjerjo serbskich institucijow, horstka sobudźěłaćerjow instituta a studenća sorabistiki. Dohromady započnje lětsa pjeć studentow a studentkow studij sorabistiki w Lipsku. Hač na jednoho, wšitcy z wusměrjenjom na wučerstwo.
Choćebuz: Wotrjad SI dźěło na nowym městnje zahajił
Z wědomostnym přednoškom je štwórtk wotrjad Budyskeho Serbskeho instituta za Regionalne wuwiće a škit mjeńšin oficialnje swoje dźěło w nowych rumnosćach w Choćebuzu zahajił. Kaž zdźěli nowinska rěčnica instituta Madlen Domaškec, sposrědkowaštaj rěčnej wědomostnikaj dr. Emily Bartholdowa a dr. Willi Wolfgang Barthold, kak móhli z prawym posrědkowanjom serbskeju rěčow k jeju rewitalizaciji přinošować. Při tym pokazaštaj wuwučowanske metody a principije, kiž móhli směrodajne być. Přednošk bě prěni w rjedźe „Regmje pśepšosyjo“ wotrjada na nowym městnje.
Miłoćicy: Droha nimale tydźeń zawrjena
W Miłoćicach so tele dny dźěle Halštrowskeje drohi ponowja. Kaž informuje Budyski krajnoradny zarjad ponowjeja tam jězdnju w dwěmaj twarskimaj wotrězkomaj. W prěnim wěnuja so nowemu pokrywej dróhi srjedź wsy wot hata hač k wotbočce na puć k Miłočanskej žabje. Druhi twarski wotrězk budźe za někotre dny wot nawsy hač do Lindacha. Ponowjenje je trěbne, dokelž je dróha chětro rozjězdźena. Hač do kónc přichodneho tydźenja ma wšitko dotwarjene być.
Šibojski jězor: Wutwar turizma dźe dale
Město Wojerecy započnje klětu w nalěću z wjacorymi twarskimi naprawami a z wutwarom turizma na zapadnym přibrjohu Šibojskeho jězora. Tole zdźěli wyši měšćanosta Torsten Ruban-Zeh na zańdźenym posedźenju měšćanskeje rady. Za wobchadne a medijowe wotkryće je nimale jedyn milion eurow planowane, za wuhladnu wěžu něšto wjace hač běrtlk miliona. Wšitke twarske projekty na zapadnym přibrjohu chcyše spočatnje brunicowe předewzaće LMBV zwoprawdźić. Dokelž pak so kraj Sakska na spěchowanju wobdźěli, wostanu tute w rukach města Wojerecy. Wone nadźija so, zo Sakska 90 procentow přewza.
