Powěsće: sobotu, 02.11.2024
Hauptinhalt
04. nazymnika 2024, 11:44 hodź.
Dźiwadło: Šěrcec Hanka wuspěšna była
Inscenacija "Šěrcec Hanka" wo katolskej Serbowce židowskeho pochada je so wčera wječor w Budyskim Němsko-Serbskim ludowym dźiwadle posledni króć předstajiła. Hnujacu hru awtorki a režiserki Esther Undiszoweje po motiwach Jurja Kocha je sebi wjace hač 4.000 hosći w serbskej a serbsko-němskej wersiji wobhladało. W 60 lětach wobstaća NSLDź je to jenička serbska hra, kotraž je so tež němskemu publikumej z wobšěrnym serbskim rěčnym podźělom předstajiła a je zdobom najwuspěšniša dwurěčna inscenacija po přewróće. Wuwiće hry je spěchowała Załožba za serbski lud.
Rjemjesło: Młodostni přimaja so gratu
Ličba zrěčenjow za wukubłanje w rjemjesle w Hornjej Łužicy wostanje stabilna. W nowym wukubłanskim lěće je tu na 500 žonow a 1.660 muži wukubłanje započało, kaž Drježdźanska rjemjeslniska komora zdźěli. Cyłkowna ličba zrěčenjow je z tym porno lońšemu wo štyri procenty stupała. Z tym spřećiwja so wukubłanske wiki w Hornjej Łužicy aktualnej konjunkturnej flawće. W komornym wobwodźe móža so wjace hač 80 powołanjow nawuknyć. Najwoblubowaniše wukubłanje je na mechatronikarja jězdźidłow. Sćěhuja wukubłanja na mechanikarja připrawow za sanitarnu, tepjensku a klimowu techniku, na elektrikarja a blidarja.
Puće a wjedro: Na zymu přihotowani
Budyski wokrjes je so derje na zymu přihotował. Jich pjeć nadróžnych mištrownjow zdźěla, zo su selowe składy derje pjelnjene, 6.300 tonow składuja. Cyłkownje maja 1.600 kilometrow dróhow sypać, hač do zymy staja hišće 37 kilometrow škitanskich płotow sněha dla. Tež w gmejnach kaž w Rakecach su na zymu přihotowani, praji wjesnjanosta Swen Nowotny. Loni nowy wobstarany traktor ma tež lětsa sněh na dróhach rumować. Runje tak wupada w Chrósćicach, hdźež je technika spřihotowana a dosć splita na składźe. Sel na puće Chróšćanskeje gmejny přirodoškita a korozije pućow a techniki dla njesypaja, tak wjesnjanosta Marko Kliman.
Towarstwo: Móža 1,4 miliony eurow přepodawać
Towarstwo za wuwiće Hornjołužiskeje hole a hatow ma za aktualnu spěchowansku periodu hač do 2027 1,4 miliony eurow. Wo tute LEADER-pjenjezy móža so wot nětka priwatnicy, towarstwa a gmejny požadać. Projekty móža jara wšelakore być, kiž so spěchuja - tak na přikład z wobłukow zastaranja a žiwjenskeje kwality, hospodarstwa, turizma kaž tež rybarstwa. Projektowe ideje móža hač dosrjedź januara zapodać. Indiwidualne poradźowanje k wuwiću a kwalifikowanju planowanych projektow wotměje so w nowembru a decembru w regionalnym běrowje w Rakecach, kaž towarstwo zdźěli.
Schadźowanka: Kartki na předań
Kartki za lětušu Schadźowanku su wot nětka na předań. Kaž hižo w minjenymaj lětomaj so lisćiki jeničce online, přez digitalneho poskićowarja Eventim předawaja. Link k tomu namakaće na internetowej abo instagramowej stronje Załožby za serbski lud. Jubilejna 150. Schadźowanka wotměje so 23. nowembra w Budyskej Krónje.
Pomnikoškit: Zarjad wjace njetrjebaja
Město Wojerecy spušći na swój pomnikowy zarjad. Kaž je měšćanska rada w tutym tydźenju jednohłósnje wobzamknyła, chcedźa nadawki pomnikoškitneho zarjada wot klětušeho krajnoradnemu zarjadej přepodać. Tak zalutuje město połne městno a z tym wjace hač 80.000 eurow. Měšćanske zarjadnistwo wobkrući krok z tym, zo dźe wjelelětny sobudźěłaćer w pomnikowym zarjedźe na wuměnk a zo dawaja přestrukturowanja w zarjadnistwje. Po swójskich podaćach su Wojerecy jeničke město w Budyskim wokrjesu, kotrež funkciju delnjeho pomnikoškitneho zarjada same wukonja.
