Powěsće: póndźelu, 31.03.2025
Hauptinhalt
01. jutrownika 2025, 03:41 hodź.
Wobsah artikla:
- Lipsk: LND z knižnymi wikami w Lipsku spokojom
- Budyšin: Z hłowneje zhromadźizny Maćicy Serbskeje
- Hospodarstwo: Spěchowanske pjenjezy předewzaćam
- Chrósćicy: Biskop sakrament firmowanja spožčił
- Hornja Łužica: Zhromadnje wotpadki rumowali
- Radwor: Sambuca Allstars třeći króć zasobu dobyli
- Wotrow: Kickerowy turněr ze 64 mustwami přewjedli
Lipsk: LND z knižnymi wikami w Lipsku spokojom
Ludowe nakładnistwo Domowina je ze zajimom na swojim poskitku na lětušich Lipšćanskich knižnych wikach přewšo spokojom. Jako publikumowe magnety wopokazachu so zběrka "Die Lausitz in Reisebeschreibungen des 18. und 19. Jahrhunderts" a knihi wo serbskich jutrach. Njewšědnje wulke bě lětsa naprašowanje za delnjoserbskimi titulemi. Čitani, kotrež je LND wuhotowało – mjez druhim prezentowaše Benedikt Dyrlich swoju nowu zběrku "Serpowe dny – Basnje a lyriska proza" – běštej nimale dospołnje wobsadźenej. Minjeny pjatk bě Sakski minister za kultus Conrad Clemens (CDU) stejišćo LND wopytał, hdźež informowaše so předewšěm wo serbskich šulskich knihach.
Budyšin: Z hłowneje zhromadźizny Maćicy Serbskeje
Maćica Serbska je sobotu w Budyšinje swoju hłownu zhromadźiznu wotměła. Kaž zdźěli předsydka wědomostneho towarstwa dr. Anja Pohončowa, je 40 přitomnych čłonow nowu wersiju towarstwowych wustawkow wobzamknyło. To bě trjeba, dokelž běštej sej financny zarjad a hamtske sudnistwo změny a dodawki žadałoj. W swojim přednošku wuzběhny mjenowědnik dr. Kito Kśižank wažnosć digitalizowanja wědomostnych wuslědkow. W tym zwisku pokaza wón na wužadanja, z kotrymiž su wědomostnicy při aktualnym digitalizaciskim projekće delnjoserbskich ležownostnych mjenow konfrontowani. Dr. Pohončowa pokaza w swojej rozprawje mjez druhim na zhromadny projekt ze Serbskej Murju, z kotrymž chce Maćica na instagramowym kanalu Serbskeje Murje prawidłownje krótke přinoški wozjewjeć.
Hospodarstwo: Spěchowanske pjenjezy předewzaćam
Małe a srjedźne předewzaća w Hornjej Łužicy su minjene tři lěta nimale 200 milionow eurow spěchowanskich pjenjez dóstali. Po informacijach Sakskeje natwarneje banki je za to z Budyskeho a Zhorjelskeho wokrjesa něhdźe 1.600 próstwow w cyłkownje 43 spěchowanskich programach dóšło. Zaměr přiražkow bě, inowacije spěchować, dźěłowe městna wutworić a kmanosć za wubědźowanje sylnić. Spěchowanja su dale móžne. Za nowe mašiny, wutwar a natwar nowych zawodow abo rozšěrjenje wuběrka produktow su za małe a srjedźne předewzaća z Hornjeje Łužicy aktualnje samo přiražki hač do 70 procentow cyłkownych kóštow móžne.
Chrósćicy: Biskop sakrament firmowanja spožčił
Dohromady 44 młodostnym je Drježdźansko-Mišnjanski biskop Heinrich Timmerevers njedźelu w Chrósćicach sakrament firmowanja spožčił. 19 holcow bě družču drastu woblečene. Swjedźenske kemše je Chróšćanski młodźinski chór wobrubił. Do toho bě biskopa dźewjeć porow křižerjow witało a jeho z korejtu do cyrkwje dowjezło. Pjatk a sobotu budźe biskop Timmerevers na wizitaciji w Chróšćanskej wosadźe po puću.
Hornja Łužica: Zhromadnje wotpadki rumowali
Mjeztym štwórty raz su wobydlerjo z Pančic-Kukowa sobotu zhromadnje we wsy a blišej wokolinje wotpadki zrumowali. Něhdźe 70 pomocnikow nazběra znowa tójšto měchow połne njerjada. Kaž zdźěli Sportowe towarstwo Marijina hwězda, kotrež je akciju w kooperaciji z přirodowej centralu Budyšin a wokrjesnym wotpadkowym zarjadom přewjedło, je drje so mnóstwo smjećow pomjeńšiło, přiwšěm pak je akcija dale trěbna. Tež 20 wjesnjanow w Sernjanach je so w běhu tydźenja na akciji wobdźěliło. Nazběrali su tam wjacore měchi połne smjećow, mjez druhim wobruče, gumijowe škórnje a stare roły.
Radwor: Sambuca Allstars třeći króć zasobu dobyli
Dobyćer 40. Sokołskeho wolejbuloweho turněra sobotu w Radworskej Slaviji je mustwo Sambuca Allstars. Wone je sej z tym třeći króć zasobu pokal Domowiny wudobyło. Mustwo wokoło Caspera Dźisławka, kotrež nastupi z jenož pjeć hrajerjemi, je so přećiwo 10 dalšim cyłkam přesadźiło. Za klětu rozmysluje Serbski Sokoł wo tym, turněr na terminje přewjesć, na kotrymž njejsu serbscy sportowcy a sportowče w towarstwowym sporće zawjazani, zdźěli předsyda Serbskeho Sokoła, Jan Hrjehor. Dale móhłoj so stupaceho niwowa dla dwaj separatnej turněraj wuhrać.
Wotrow: Kickerowy turněr ze 64 mustwami přewjedli
Minjenu sobotu wotmě so w młodźinskim klubje we Wotrowje tradicionalny kickerowy turněr. K mjeztym hižo 15. razej wubědźowaše so lětsa 64 mustwow wo požadany dobyćerski pokal. Na kóncu so mustwo "Ballistor" ze Zhorjelca přesadźi. Tak mjenowany 'Lucky-Looser' turněr doby mustwo 'Unterdorf' - Marian Kreuz a Dominik Měrćink z Wotrowa. Jako najlěpši hrajer turněra bu tohorunja Wotrowčan wuznamjenjeny - mjenujcy Jakub Wjacławk. Nimo wobdźělnikow bě sej tež tójšto přihladowarjow do Wotrowa dojěło.
