Powěsće: wutoru, 01.04.2025
Hauptinhalt
01. jutrownika 2025, 08:14 hodź.
Budyšin: Dosć milionow za Forum wědy
Za Forum wědy na Lawskim arealu w Budyšinje steja wjace spěchowanskich srědkow k dispoziciji, kaž zdźěli zašły tydźeń Sakske ministerstwo za infrasktrutkuru a krajne wuwiće. Město 44,5 maja nětko 50,0 milionow eurow k dispoziciji. Při planowanju Foruma wědy bě so zwěsćiło, zo spočatna suma njedosaha. K tomu praji direktor Załožby za Serbski lud, zo je to zasadnje dobra powěsć, zo so spěchowanska suma powjetši. Hladajo na dźensniše płaćizny njeje hižo wjace móžno, projekt za 44,5 milionow eurow zrealizować. Najwjetše wužadanje budźe, zo tute srědki w běhu twara njepřekročimy, tak Budar dale. Twar Serbskeho foruma wědy na Lawskim arealu w Budyšinje započnje so lětsa hišće. W nowotwarje matej so Serbski muzej a Serbski institut zaměstnić.
Worklecy: "Michał Hórnik" prěni serbski satelit startuje
We wobłuku projektnych dnjow k přirodowědnym předmjetam na Serbskej wyšej šuli we Worklecach startuje wutoru dopołdnja prěni serbski satelit z mjenom "Michał Hórnik" do swětnišća. Wón je přičinjeny na wjedrowy balon, kiž zběhnje so do stratosfery. We wysokosći něhdźe 40 kilometrow zběra balon wjedrowe daty a wobrazy a po tym zaso přizemi. Satelit ma porno tomu horjeka wostać. Jeli so pilotowy projekt, kiž je nastał w kooperaciji firmy stratoflights, TU Drježdźany a Serbskeje wyšeje šule Worklecy poradźi, maja dalše serbske mini-satelity sćěhować. Nastać ma syć, kiž autarkne přenjesenje serbskorěčnych livestreamow pospěši.
Budyšin: Partnerstwu za demokratiju fenki šmórnu
Budyski wokrjes hižo spěchowacy program "partnerstwo za demokratiju" dale njepowjedźe. Napjateho hospodarskeho połoženja dla je zarjadnistwo wokrjesa cofnjenje swójskeho podźěla wysokosći 50.000 eurow namjetowała. Wokrjesni radźićeljo su namjet z hłosami AfD, CDU, BSW a swobodnych wolerjow z wulkej wjetšinu přiwzali. W zašłych lětach su wjesne kluby a cyłki, cyrkwje kaž tež kulturne a sportowe towarstwa pjenjezy z programa dóstali. Serbskej radźićelej Dawid Statnik a Jan Budar staj za zdzerženje projekta hłosowałoj.
Dźiwadło: Swětowy dźeń šulerskeho dźiwadła tež serbsce
Něhdźe 600 hrajerjow a rejowarjow ze šulow wuchodneje Sakskeje wustupi wčera na 24. Swětowym dnju šulerskeho dźiwadła, při Němsko-Serbskim ludowym dźiwadle. Mjez 30 skupinami běštej tež dorostowej skupinje dźěći a młodostnych při NSLDź a zakładneju šulow z Pančic-Kukowa a Wojerec. Něhdźe 3500 přihladowarjow k předstajenjam lětsa zličichu.
Slepo: Wobtwarjenski plan za wětrniki wostanje
W Slepom móže so dale za twar wětrnikow a solarnych parkow we Mułkecach planować. To je wuslědk póndźelnišeho wurjadneho posedźenja Slepjanskeje gmejnskeje rady. Wotpowědnu próstwu wo zběhnjenje planow wužiwanja přestrjenjow w Mułkecach njeměješe wjetšinu. Sydom radźićelow bě za a sedmjo přećiwo tomu. Wobydlerska iniciatiwa so přećiwo planam za wětrniki a solarne parki na Mułkečanskich nasypach wobara. W onlinowej peticiji je nimale 7.000 podpismow přećiwo tomu nazběrała.
