Powěsće: srjedu, 02.04.2025
Hauptinhalt
02. jutrownika 2025, 08:24 hodź.
Łužiska jězorina: Sylnišo pólskich turistow wabić
Zaměrowy zwjazk Łužiska jězorina Sakska chce sylnišo pólskich turistow wabić. To praji předsydka turistiskeho zwjazka Łužiska jězorina, Kathrin Winklerowa wutoru na posedźenju we Wojerecach. Za to su pólsku póstowu kartu naćisnyli, so na dowolowych wikach w Pólskej prezentowali a dźěłarnički z pólskimi partnerami na městnje organizowali. Dale planuja tež jězbu z pólskimi žurnalistami po Łužiskej jězorinje. Kaž Winklerowa dale praji, sej pólscy hosćo město sportowanja wosebje industrijowe stawizny, historiske podawizny a zajimawostki wokoliny česća.
Hózk: Čorny Halštrow do stareho rěčnišća
Za renaturěrowanje Čorneho Halštrowa mjez Hózkom a Koćinu je planowanje naćiska z wotpowědnymi přepytowanjemi wotzamknjene. Kaž zdźěli Krajny zarjad za rěčne zawěry, zdźěłuja tuchwilu plan za hladanje krajiny a koncept za škit pódy. Za přepołoženje rěki do swojeho stareho rěčnišća trjeba zarjad tež přizwolenje wobsedźerjow, kotrychž ležownosće chcedźa za to wužiwać. Prěnje plany wo renaturěrowanju su wobsedźerjam ležownosćow hižo w februaru předstajili. Hakle hdyž wšitke přizwolenja předleža, móže zarjad nadawki wupisać a ze zwoprawdźenjom započeć. Zamołwići wuchadźeja tuchwilu z toho, zo 2028 započnu.
Łužica: Namjety za wubědźowanje "Rěč zwjazuje" zapodać
Wot spočatka apryla móža so namjety za wubědźowanje "Rěč zwjazuje" pola Załožby za Serbski lud zapodać. Onlinowy formular je na internetowej stronje załožby přistupny. Hač do 16. meje móža priwatne wosoby, towarstwa a gmejny swoje ideje za inowatiwne projekty, kiž zaběraja so ze serbskej rěču zapodać. Hač do 10.000 eurow móža za zwoprawdźenje tutych dóstać. Cyłkownje załožba 70.000 eurow na 17 projektow rozdźěli.
Slepo: Wuslědki monitoringa wody
Zdźerženje dnowneje wody blisko powjercha w Slepjanskej kónčinje je dale wažny nadawk. To wuchadźa z monitoringa LEAG za wodu. Tak bě 2023 w kónčinje włóžne lěto, loni pak bě zaso pře sucho. Wokoło Rowneho a Mułkec ma wudobywanje brunicy wulki wliw na dnownu wodu, zasadnje pak je wšudźe stabilna, tak projektowy nawoda monitoringa Tobias Radach. Monitoring přepytuje a měri aktualne pegele dnowneje wody, słódkeje wody w jězoracha a rěčkach kaž tež spadki.
Aprylski žort: Serbski satelit wostanje són
We powěsćach wutoru smy wam zdźělili, zo měješe we wobłuku projektnych dnjow na Serbskej wyšej šuli we Worklecach prěni serbski satelit startować. Tute předewzaće bě wumyslene. Štož njetrjechi je start serbskeho satelita, přez kotryž měli so serbske wobsahi streamować. Satelit "Michał Hórnik" potajkim njedawa. Wěrne pak je, zo su we Worklecach wjedrowy balon do njebja pušćili, kiž dyrbješe filmować, wjedrowe daty zběrać a stratosferu docpěć. We wysokosći 32 kilometrow je potom prasnył a po planje zaso wróćo na zemju padnył. Worklečanscy šulerjo su jón blisko Ortranda nadešli. Srjedu šulerjo eksperiment wuhódnoća. Lět wjedroweho balona do stratosfery bě projekt we wobłuku MINT-dźěłarničkow, kiž maja hač do dźensnišeho na Serbskej wyšej šuli "Michał Hórnik" we Worklecach.
