Powěsće: štwórtk, 03.04.2025
Hauptinhalt
03. jutrownika 2025, 15:09 hodź.
Budyšin: Projekty za druhe połlěto 2025 zapodate
Za spěchowansku dobu Załožby za Serbski lud za druhe połlěto 2025 je 40 próstwow dóšło, zdźěli Nicole Zimmermannec, nawodnica teama, kiž spěchowanja wobdźěła. Cyłkowny wolumen zapodatych próstwow wučini nimale 200.000 eurow. Mjez nimi su wjacore hudźbne projekty a koncerty młodych, ale tež znatych wuměłcow. Tež narodnu drastu chcedźa někotre cyłki ponowić abo samo nowe šić dać. Kónc meje so fachowa přirada za projektowe spěchowanje zetka a wo zapodatych próstwach wuradźuje.
Drježdźany: Domowina a Serbski sejm na rozmołwje z BSW
Zastupjerjo Domowiny a Serbskeho sejma su započatk tydźenja frakciju BSW w krajnym sejmje wopytali. To wuchadźa ze zdźělenki frakcije BSW. W rozmołwje z předsydu Domowiny, Dawidom Statnikom a Clemensom Škodu běchu wužadanja w kubłanju centralna tema. Zastupjerjo Serbskeho sejma wuprajichu přeće, serbski lud sylnišo do rozsudow zapřijeć. Tež hospodarske a kulturne wuwiće bě dźěl rozmołwy. Domowina kaž tež Serbski sejm chcetej so tež ze zastupjerjemi dalšich frakcijow demokratiskich stronow w Sakskim krajnym sejmje zetkać.
Lejno: Zetkanje chronikarjow župy Kamjenc
15 wjesnych chronikarjow a zajimcow bě srjedu přeprošenju Kamjenskeje župy "Michał Hórnik" do Lejna sćěhowało. Kaž rjekny županka Diana Wowčerjowa, bě to po pjeć lět trajacej přestawce prěni króć, zo su tajke zetkanje organizować móhli. Mjez druhim wuměnjachu so přitomni z horjanskich a delanskich wsow w Lejnjanskim hosćencu wo swojich ćežišćach a dźěłowym wašnju, kak wjesne stawizny dokumentuja. W přichodźe chcedźa so dwójce wob lěto zetkać a sej k tomu tež fachowcow k přednoškam přeprosyć.
Wojerecy: Nowy orientaciski system za pěškow
Po Wojerowskim nutřkownym měsće planuja nowy orientaciski system za pěškow. Wón ma dotalny bruny wodźenski system z lěta 1998 narunać. To zdźěli měšćanske zarjadnistwo. Zaměr je, pućiki za pěškow přehladnišo a načasnišo wuhotować. Wobydlerjo móža so na planowanju wobdźělić. Planowane je naprašowanje, z kotrymž chcedźa mjez druhim wo barbnym koncepće za nowy system rozsudźić. Štyri warianty steja na wuběr.
Sewjerna Friziska: Přełožowanski program online
Dalša mjeńšinowa rěč Němskeje, mjenujcy sewjerna frizišćina startuje dźensa, štwórtk, online ze swójskim přełožowanskim programom, zdźěli Robert Kleih, předsyda załožby sewjernych Frizow na kupje Föhr. W běhu połdra lět je nastała přełožowanska pomoc, kiž podobnje serbskemu wotpowědnikej sotra.app funguje a tak cyłe sady a krótke teksty z němčiny a jendźelšćiny do sewjerneje frizišćiny a nawopak přełožuje. Sewjernu frizišćinu rěči něhdźe 10.000 ludźi.
