Powěsće: wutoru, 22.04.2025
Hauptinhalt
22. jutrownika 2025, 11:26 hodź.
Jutry: Křižerjo w serbskich katolskich wosadach
W serbskich katolskich wosadach je jutrowničku w dźewjeć procesionach dohromady 1.376 křižerjow jutrowne poselstwo wozjewiło. To běchu štyrjo křižerjo mjenje hač loni. Wjetšich njezbožow lětsa pola serbskich křižerjow njebě. Cyłkownu statistiku křižerskich procesionow namakaće na našej internetowej stronje a w našej app MDR Serbja. Wutoru wječor je w Róžeńće dźakna Boža mša křižerjow. Serbski rozhłós ju originalnje wusyła, tež přez livestream.
Nałožki: Jutrowne spěwanje w ewangelskich wosadach
We wšelakich kónčinach dwurěčneje Hornjeje Łužicy su jutry zaso tradiciju jutrowneho spěwanja hajili. We Wuježku pod Čornobohom bě jutrowničku rano něhdźe 60 ludźi pódla, mjez nimi skupina potomnikow serbskich wupućowarjow z Awstralskeje. W Rownom a Slepom je njedźelu rano skupina žonow jutrowne kěrluše zaspěwała. W Čornym Chołmcu bě lětsa 22 žonow w žarowanskej drasće sobotu wječor při pasionskim spěwanju pódla.
Wobchad: Mjenje ćahow do Zhorjelca
Na železniskej čarje mjez Budyšinom a Zhorjelcom w přichodnymaj tydźenjomaj kóždy druhi ćah wupadnje. Město toho jězdźa busy. Kaž předewzaće Länderbahn zdźěli, su přičina twarske dźěła při kolijach. Tute maja wot wčerawšeje póndźele hač do 5. meje trać. Pućowacy měli so sčasom wo změnach w jězbnym planje informować.
Budyšin: Nawal w "jutrownym měsće"
Zašły kónc tydźenja je na 60.000 hosći jutrowne a kulturne poskitki w Budyšinje wopytało. Takle trochuje Budyske turistiske towarstwo. Organizatorojo rěčachu wo masach, kiž so po hasach města hibachu. Něhdźe 400 dźěći wuži njedźelu poskitk jejkakulenja na Hrodźišku. Wjeršk jutrownički w Budyšinje bě křižerski procesion. Tež wiki sobotu a mnoho wotewrjenych atrakcijow města, kaž wěže a cyrkwje, tójšto ludźi z tu- a wukraja přiwabichu.
