Powěsće: štwórtk, 24.04.2025
Hauptinhalt
24. jutrownika 2025, 10:09 hodź.
Kulow: Město podźěle nošerjow zniži
Město Kulow chce nošerjow pěstowarnjow při financowanju jich swójskeho podźěla wolóžić. K tomu wuzna so jednohłósnje měšćanska rada. Tak ma so swójski podźěl nošerjow pěstowarnjow wot 2,5 procentow na 1,75 procentow redukować. Z tym reaguje město na cyłkownu situaciju za nošerjow w měsće a wokolinje, kotřiž móža lědma hišće swójski podźěl za zawodne kóšty zwjesć. Tež w Kulowje, tak měšćanosta Markus Posch (CDU), ličba dźěći aktualnje woteběra.
Worklecy: Wjetše inwesticije móžne njejsu
We Worklecach su z dźěłami za zwottorhanje a přetwar wyšeje šule započeli. Tole zdźěli wjesnjanosta Clemens Poldrack srjedu na posedźenju gmejnskeje rady. Tež móst mjez Lejpoldom a Worklecami móžeše gmejna za něhdźe 5.000 eurow wuporjedźić. Nimo toho wobzamknychu lětuši hospodarski plan, w kotrymž ma gmejna wěsty financielny zastatk, kiž pak móže ze swójskimi pjenjezami wurunać. Po słowach Poldracka lětsa žane wjetše inwesticije w gmejnje Worklecy móžne njejsu.
Budyšin: Pjaty raz "Prózdniny z instrumentom"
Hižo pjaty raz přewjedźe Serbski ludowy ansambl tutón tydźeń swoje "Prózdniny z instrumentom". 19 dźěći a młodostnych nazwučuje pod nawodom Jana Brězana serbske spěwy. Nimo zwučowanja maja tež dalše akcije planowane, mjez druhim rejowansku dźěłarničku a wopyt instrumentotwarca Löbnera w Budyšinje. Pjatk so lěhwo ze zjawnym koncertom zakónči.
Tradicije: Kampanja wo drastach w Sakskej
We wabjenskej kampani "So geht sächsisch" informuje Sakska statna kenclija nětko tež wo tradicionelnych drastach w swobodnym staće. Interaktiwna karta předstaji nimo drastow z Vogtlanda, Rudnych horin a Hornjołužiskich horow tež serbske narodne drasty. Su to rejowanska drasta holcow z katolskeho regiona kaž tež Wojerowska, Slepjanska a Mužakowska drasta. Za to staj rodźenaj Hornjołužičanaj Jan Lorenc a Jakub Gruhl originalne drasty třidimensionalnje zascannowałoj. Kampanja předstaji nimo toho ludźi, kiž so w Sakskej za zdźerženje a dalewuwiće tradicionelnych drastow horja, kaž modowy label SerbskiKonsum a Wjacławkec wobchod we Wojerecach.
Pančicy-Kukow: Wčera swójbny dźeń w klóštrje
Na klóšterskej zahrodźe w Pančicach-Kukowje je wčera něhdźe 800 hosći swójbny dožiwjenski dźeń wopytało. Nimo mnohich poskitkow za dźěći móžachu starši so wot patra Johannesa po klóštrje Marijina hwězda wodźić dać. Tež sportowe poskitki a akcije wokoło přirody a wobswěta za cyłu swójbu běchu organizowane. Dźeń bě dźěl kubłanskeho poskitka Křesćansko-socialneho kubłanskeho skutka.
Budyšin: Žani ćěkancy wjac w Sprjewinym hotelu
Budyski wokrjes dom za požadarjow azyla w něhdyšim Sprjewinym hotelu w Budyšinje-Bórku kónc oktobra zawrěje. Kaž krajnoradny zarjad zdźěli, so potom doba wotnajenskeho zrěčenja z mějićelom hotela skónči. Hladajo na spadowace ličby ćěkancow twarjenje w přichodźe hižo za zaměstnjenje tutych njetrjebaja, tak zarjad. Dalši tajki dom w Delnjej Hórce, tohorunja něhdyši hotel, bě wokrjes hižo nětko srjedź apryla zawrěł.
