Powěsće Serbskeho rozhłosa
Hauptinhalt
09. jutrownika 2025, 10:05 hodź.
Hornja Łužica: Mjenje chmjela na polach
Tójšto ratarjow swoju produkciju chmjela redukuje. Spadowacych płaćiznow dla skići so tež tu w Hornjej Łužicy podobny wobraz. Porchowski ratarski zawod runje dźesać hektarow chmjela wutorha, dokelž su zrěčenja wuběželi. Z tym wobhospodarja jenož hišće 40 hektarow. Kaž rjekny nawoda Christoph Liebelt, njedadźa jemu tuchwilu wulke firmy, kiž chmjel nakupuja, žanu perspektiwu. Tohodla njemóže planować, ale chmjel trjeba tři lěta prjedy hač połnje njese. Dla tutoho přewulkeho rizika chce lětsa tuž na swobodnych polach majs zesadźeć. Dale do Krěpjec: Tamniši zawod ABK chce měrny wostać a swój chmjel kaž dotal na 52 hektarach plahować. Kaž praji sobudźěłaćer Frank Hommel, su płaćizny z jednym eurom wob kilo chmjela jara snadne. Hommel njespušći pak nadźiju, zo so płaćizny tola zaso zhrabaja. W přerězku nažněja w Krěpjecach kaž tež w Porchowje na hektar něhdźe dwě tonje chmjela.
Lejpold: Dóstanu pitnu wodu a móst bórze hotowy
Ležownosće w Lejpoldźe pola Worklec přizamknu so na centralnu syć za pitnu wodu. W zašłych tydźenjach buchu wotpowědne roły z Worklec składźene. Tež móst mjez Worklecami a Lejpoldom so dale twari. Kaž wjesnjanosta Clemens Poldrak na naprašowanje zdźěli, chce twarska firma trěbne skowanske dźěła w tutym tydźenju přewjesć. Jutry ma móst doskónčnje ponowjeny być a z tym puć zaso wotewrjeny. Potom pak jenož hišće za jězdźidła hač do 3,5 tonow.
Budyšin: Pokročowanja sorabistiskeje wučby na Dualnej wysokošuli
Hač so sorabistiska wučba za studowacych Dualneje wysokeje šule Budyšin w Serbskim instituće dale powjedźe, njeje hišće jasne. Kaž dr. Susanne Hozyna zdźěli, chcedźa so wo potrěbnosćach wysokeje šule na jednym boku a wo móžnych poskitkach Serbskeho instituta na druhim boku hišće dorěčeć. W měrcu a spočatk apryla bě so prěni raz na 20 studowacych hospodarskeje informatiki ze serbskej kulturu a identitu w dwěmaj blokowymaj seminaromaj zaběrało.
Njeswačidło: Gmejna předa ryćerkubło
W Njeswačidle ma so ležownosć něhdyšeho ryćerkubła předać. Wutoru wječor je gmejnska rada wjesnjanosće Gerdej Schusterej nadawk přepodała, twarjenja wurumować dać a so wo kupcow starać. Za čas NDR běše Njeswačanske prodrustwo dźěle ryćerkubła jako hródź wužiwało. Dźensa składuje so w nich na přikład sól za zymsku słužbu. Z předanju objekta blisko sportnišća nadźija so gmejna na pjenjezy, kotrež móhła potom za komunalne nadawki wudać.
Łaz: Nowy solarny park w Běłym Chołmcu
W Běłym Chołmcu ma na 4,5 hektarach nowy solarny park nastać. Gmejnska rada je wutoru wotpowědne płoniny za to wupokazała. Tute słušeja Běłochołmčanskej agrarnej GmbH. W meji a juniju so plany zjawnje wupołoža, wobydlerjo móža swoje wobmyslenja zwuraznić. Firma z Badensko-Württembergskeje je zrěčenje, zo móhli płoniny wotnajeć, podpisała. Wot kónca lěta ma solarny park w Běłym Chołmcu šěsć megawattow miliny produkować.
Stróža: Turistiske předewzaća
Towarstwo za wuwiwanje regiona Hornjołužiska hola a haty (OHTL) je wubědźowanje "Nowe puće za gastronomiju" zahajiło. To zdźělichu wutoru na turistiskim dialogu města Budyšina a regiona OHTL w Stróži. Wubědźowanje měri so na gastronomow, pjekarjow, rěznikow a dalšich regionalnych producentow a běži hač do spočatka awgusta. Na wčerawšim zetkanju z někak 40 turistiskimi partnerami z hospodowanja a gastronomije bě tež zdobywanje fachowcow wažna tema. Tak je zastupjerka industrijoweje a wikowanskeje komory IHK projekt "Hand in Hand for International Talents" wobdźělnikam bliže předstajiła.
