Dokumentacija "Dolina smjerće": To bě předpremjera wčera w Chrósćicach
Hauptinhalt
29. jutrownika 2025, 13:12 hodź.
„W mojim žiwjenju njeje so mi ničo tak hłuboko zašćěpiło kaž tute poslednje dny w aprylu 1945. Bě tak surowe, zo so mi dźensa hišće wo tym dźije."
Tak rysuje 90-lětny Jurij Nuk wone dny před 80 lětami w Hornjej Łužicy. WUHLADKO poda so w połhodźinskej dokumentaciji na časowu jězbu do serbskich wsow mjez Budyšinom a Kamjencom – do tak mjenowaneje „Doliny smjerće”.
Dokumentacija "Dolina smjerće" je so wčera k prěnjemu razej zjawnosći prezentowała. Na serbskorěčnu premjeru je wčera wječor na 200 wopytowarjow přišło. Dokumentaciji po knize a w režiji Pětra Symanka přizamkny so podijowa diskusija. Z redaktorom filma Romanom Nukom, historikarjom Benediktom Cyžom a časowymi swědkami rozmołwješe so Bogna Korjenkowa, a tež publikum prašenja staješe. Hižo připołdnju bu pólskorěčna wersija wot pólskeje delegacije derje přiwzata.
Do toho wopominachu w Chrósćicach při tamnišim pomniku w Druhej swětowej wójnje w Hornjej Łužicy padnjenych pólskich wojakow. Kaž kóžde lěto 28. apryla zetkaja so za to zastupjerjo gmejny, přiwuzni a hosćo z Pólskeje. We wjacorych narěčach so na zrudny dóńt pólskich wojakow spominaše. Chór serbskeje zakładneje šule Chrósćicy je program sobu wuhotował. Chróšćanski wjesnjanosta Marko Kliman wuzběhny wuznam wopominanja: "Hdyž sej dźensniši swět wobhladaš, so ći zdawa, zo je ćim wažniše, zo ze zašłosće wuknjemy", rjekny wón.
Pokiw: We Wuhladku so film tohorunja pokaza a to sobotu, 03.05.2025, 12.00 hodź. w telewiziji MDR (Sakska regionalna), runočasnje jako livestream w interneće a w mediatece ARD. Wospjetowani: póndźelu, 05.05.2025, 6.45 hodź. w MDR a sobotu, 10.05. w 13.35 hodź. w RBB (Braniborska).Němsku wersiju dokumentacije pokaza telewizija MDR njedźelu, 04.05.2025 w 22.20 hodź.
